CEBU, Philippines – Usa ka classroom sa Kawit Elementary School sa lungsod sa Medellin ang giingong depektoso ang pagkatukod sumala pa sa hepe sa Provincial Disaster Risk Reduction Management Office (PDRMO) nga si Baltazar Tribunalo.
Si Tribunalo mibutyag sa mga tigbalita nga dihang mibisita siya sa lugar niining ulahi lang nabantayan niya ang maong classroom nga nagtulo dihang mibundak ang uwan ug ang bongbong giingong nangaliki ug nihunob ang tubig sa uwan.
Ang maong classroom bag-ohay lang gitukod gamit ang pundo sa Department of Education (DepEd).
Apan si Mayor Ricky Ramirez wala pa makadawat og report kabahin sa maong problema apan iya kining ipasusi sa district supervisor sa tunghaan ug municipal engineer.
Mga non-government organization (NGO) ang nagpahigayon og pagpangayo sa mga naguba nga classrooms human sa bagyong Yolanda.
Si Ramirez miawhag sa mga nasudnong ahensiya makig-alayon kanila kung may proyekto nga himuon aron makahibalo sila kung may problema.
“Usahay anha nako mahibawo kung dunay turnover….pero nindot unta ‘to naa unta’y coordination pahibaw-on unta mi ba,” matud ni Ramirez.
Gisanglitanan ni Ramirez ang Department of Public Works and Highways (DPWH) nga makig-alayon gyud kanila kung dunay himuong proyekto. – /GMR) (BANAT NEWS)