CEBU, Philippines – Ang pagsirado sa A.S. Fortuna Extention, ang karsada nga nagsukad sa dalan A. del Rosario ug molapos sa luyo nga bahin sa Cebu International Convention Center (CICC) sa Barangay Guizo, Dakbayan sa Mandaue maoy hinungdan sa nasinati nga trapiko sa ubang lugar.
Si Mandaue City Planning Officer Florentino Nimor mipasabot nga ang pagsirado sa maong dalan gitumong sa paghatag og higayon sa kontraktor sa pagpahimutang sa mga box culvert.
Gipasabot ni Nimor nga ang katuyoan sa maong proyekto mao ang pagpataas sa maong dalan nga masusama ang iyang kahimtang sa dalan A.S. Fortuna ug dalan M.C. Briones.
Giklaro hinuon ni Nimor nga ang maong proyekto dili gayud makasulbad sa nasinati nga pagbaha sa maong dapit sa panahon nga kusog ang pagbunok sa ulan. Si Engr. Nelmar Duroy, DPWH 7 project inspector, miingon nga nasayod na ang mga lumolupyo sa mga kalamboan sa ilang proyekto.
Matud ni Engr. Duroy nga ang ripraping sa A.S. Fortuna Extention sa Barangay Guizo kabahin sa P83 milyones nga proyekto nga gipatuman sa DPWH 7. – /RUB) (BANAT NEWS)