CEBU, Philippines - Nanawagan si Arsobispo Jose Palma alang sa pag-ampo ilabi na sa mga nangamatay sa bagyong Yolanda usa na ka tuig ang nakalabay.
Matud ni Palma nga sayud siya nga hangtud karon nagbangutan pa gihapon ang mga tawo ilabi na nga kadaghanan wala pa nakapabarug sa ilang pinuy-anan ug ang pipila wala pa kadawat og hinabang gikan sa gobiyerno. Gi-ampo ni Palma nga bisan pa man sa kalisdanan nga nasinati dili mawagtangan sa paglaum ug magpadayon gihapon sa kinabuhi.
Si Palma mitataw nga dili usab angay kalimtan ang tabang nga miabot gikan sa nagkalain-laing donors ug ubang nasud nga nagpakabana alang sa kaayuhan sa tanan.
Niadtong Sabado, Nobiyembre 8, ang sumad usa ka tuig sa pagkuso-kuso sa bagyong Yolanda sa Kabisay-an.
Human sa usa ka tuig, daghan pa gihapon ang mireklamo tungod sa giingong kahinay sa lihok sa gobiyerno sa rehabilitasyon.
Si Palma nipadayag nga angay hinumduman nga wala nag-inusara ang mga biktima tungod kay anaa ang simbahan ug ang katawhan nga miunong. Panawagan ni Palma nga ipakita nga ang tanan nagkahiusa ug andam mutabang sa mga nanginhanglan. (BANAT NEWS)