CEBU, Philippines - Ang kadagkoan sa Bangko Sentral ng Pilipinas (BSP) mipahigayon og kalihukan dinhi sa Sugbo diin ang mga bata gitudloan nila kun unsaon pagdaginot aron sila makatigum alang sa ilang kaugmaon.
Ang maong kalihukan gitambongan sa kapin 60 ka tinun-an sa elementarya gikan sa Cebu City Central School ug B-Kim Center of Arts and Sciences.
Si Gobernador Hilario Davide III ug mga opisyal sa BSP mitambong sa paglusad kaniadto’ng Miyerkules sa 5th Money Matters for Kids (MMK) exhibit nga diha gihimo sa rehiyonal nga buhatan sa BSP sa Osmeña Boulevard.
Ang MMK usa kini ka interactive exhibit kabahin sa financial literacy alang sa kabataan nga nagpanuigon gikan sa 12-anyos paubos diin tudloan sila sa konsepto unsaon sa pagtigom, paggasto ug pag-sharing sa kwarta.
Ang kabataan edukahon usab kabahin sa ka importante sa pagtigom alang sa kaugmaon.
Si Dr. Johnny Noe Ravalo, assistant Governor sa BSP’s Financial Supervision Research and Consumer Protection Sub-sector, nagkanayon nga ang financial literacy dili kini usa ka event kundili usa ka “lifelong process”.
Ang kadagkoan sa BSP nagkanayon nga ang MMK exhibit nakaagni na kini og kapin sa 19 mil ka kabataan ug mga adult sukad niadtong tuig 2011.
Ang exhibit maghatag og kahigayonan sa viewers nga mopahigayon sa role isip bank manager ug teller ug makahibawo usab sila sa konsepto sa deposits ug withdrawals pinaagi sa “make-believe bank” ug sa “mock-up” Automated Teller Machine (ATM).
Gitudloan usab sila pag-ila sa peke ug dili peke nga kuwarta. Ang exhibit bukas kini hangtud sa Nobiyembre 14 gikan sa alas 8:30 sa buntag hangtud sa alas 5 sa hapon. (BANAT NEWS)