CEBU, Philippines - Igo na lang sa pagpatulo sa iyang luha ang usa ka 47- anyos nag Top 6 Most Wanted sa kapulisan sa rehiyon human kini nasikop sa mga sakop sa Regional Anti Illegal Drugs Special Operations Task Group (RAIDSOFT 7) ug Provincial Intelligence Branch (PIB) sa lalawigan sa Bohol.
Mokabat sa P11.8 milyones nga kantidad sa shabu ang nasakmit gikan sa suspek nga si Dominador Hera alyas Jun Daot diha sa West Kabol-an Island sa probinsiya sa Bohol.
Matud pa ni Senior Inspector Henrix Bancoleta ang team leader sa RAIDSOFT- 7 sa maong operasyon nga nahinabi sa Banat News idlas kaayo si Hera ug makadaghan na kining nakaikyas sa operasyon diha sa Pasil, Cebu City.
Ang suspek dunay warrant of arrest nga giisyu ni RTC Judge Macaundas Hadjirasul sa Branch 8 sa dakbayan sa Sugbo sa kaso may labot gihapon sa drugas.
Giingong nakabantay unta si Hera sa mga polis apan gibiyaan siya sa iyang mga sakop.
Nagdala og itom nga bag si Hera atol sa pagkasikop kaniya nga ang sulod pito ka dagkong putos nga gituohang shabu ug duha ka medium size pack niini nga mitimbang og dul-an usa ka kilo nga mikantidad og P11,800,000.
Gawas sa drugas nakuha sa sulod sa balay sa suspetsado ang usa ka .30 caliber Garand rifle , usa ka Automatic Rifle-15(AR-15), usa ka .357 revolver, usa ka .9mm pistol ug daghang mga bala.
Nasayran nga dunay duha ka jetskis si Hera ug duha ka pumpboats nga double engine nga gituohang gigamit niini sa iyang operasyon.
Matud pang Bancoleta nga ilado sa maong isla si Hera kay gihulagway siya nga “Robin Hood” sa maong lugar tungod kay dili kini hakog ug kusog kaayo nga motabang pinansiyal sa iyang mga silingan.
Ang hepe sa Police Regional Office -7 nga si Chief Supt. Prudencio Tom Bañas ang mihulagway nga mao kini ang labing dako nga kantidad sa drugas nga ilang nasakmit karong tuiga.
Matud pa konektado sa Muntinlupa drug syndicate ang naglihok sa maong lugar. Wa mohatag og pamahayag si Hera dihang gipangayoan og komento sa mga tigbalita. (BANAT NEWS)