CEBU, Philippines – Nawad-an sa iyang mahalon nga mga butang ang usa ka Intsik nga nagdumala sa Komart Star sa dalan M.C. Briones, Subangdaku, dakbayan sa Mandaue.
Kini human nabiktima sa gituohang mga sakop sa Salisi Gang nga nagpakaaron-ingnon nga kustomer alas 9 pasado niadtong Lunes sa buntag.
Ang biktima mao si Jenwen Lou nga taga Labangon, dakbayan sa Sugbo kinsa nawad-an sa iyang i-Pad ug duha ka cellphone nga nagkantidad og P20,000.
Si SPO1 Michael Limalima sa Presinto 2 sa Mandaue City Police Office (MCPO) miingon nga nalinga ang biktima sa pagpahimutang sa mga display sa tindahan dihang misulod ang babaye ug lalaki nga kustomer ug nagsuroy-suroy sa pagpili sa mga baligya. Dugang ni Limalima nga nanggawas ang duha nga wala’y gipalit ug nadiskubrehan na lang ang kalit nga pagkawagtang sa maong mga butang nga gipatong sa ibabaw sa lamesa.
Tan-awon sa kapolisan ang close circuit television (CCTV) camera sa maong tindahan alang sa pag-ila sa panagway sa duha ka kawatan. – /GMR) (BANAT NEWS)