CEBU, Philippines – Hangtod karon wala pa gihapon maila kung si kinsa ang lalaking gipunggotan og ulo ug kinatawo nga gipaslak sa usa ka lungag diha sa Sitio Makatol, Barangay Biga, Toledo City.
Matud pa ni Police Officer 3 Alfredo Barquin sa DAS Sub-Police Station nga nahinabi sa Banat News wala pay miduol kanila nga tagtungod.
Sumala pa ni Barquin nga duna’y usa ka babaye nga miadto sa buhatan sa kapulisan nga nangita sab sa iyang kauban sa ilang balay nga wala na nauli. Apan gipasabot ni Barquin nga sa dihang ilang gipangayoan sa diskripsyon wala kini mohaom sa patay nga lawas.
Apan sa report sa GMA News Cebu Balitang Bisdak, nasayran nga duna na’y mi-claim sa maong patay nga lawas pinaagi sa iyang duha ka igsoon.
Ang maong patay nga lawas naila nga si Alonie Olasiman, 39, ug dunay kaipon sa dakbayan sa Toledo.
Si Ariel nga igsoon nga lalaki sa namatay mitug-an nga ilang nailhan ang patay gumikan sa bukol niini sa iyang tiil, ug ang iyang tattoo sa dughan nga pipila pa ka adlaw gipa-tattoo.
Ang kapulisan nagpaabot pa sa mga tagtungod aron masugdan ang ilang imbestigasyon. – /EIM) (BANAT NEWS)