CEBU, Philippines – Patay ang backrider sa motorsiklo samtang angol ang drayber niini ug angol ‘sab ang laing drayber nga napagan sa maong panagbangga sa miaging gabii sa Sitio Caipilan, Barangay Poblacion I sa dakbayan sa Carcar.
Ang namatay naila nga si Joseph Nilles, samtang ang naangol mao si Joseph Montemayor, 36, taga Sayaw, Barili ug ang drayber sa trak nga si Edwin Castañares, 41, taga Tabok, Mandaue City.
Si Police Officer 1 Dennis Cabajar nga nahinabi sa Banat News miingon nga padulong sa dakbayan sa Sugbo ang trak samtang gikan ang motor sa Barili padulong sa dakbayan sa Carcar.
Matud pa ni Cabajar nga misulay og overtake si Montemayor sa truck apan may kasugat siya hinungdan nga naninguha kini nga makalusot og una apan naigo kini sa atubangan sa truck hinungdan nga nalamba sila sa dalan.
Swerte ang drayber kay sa wala nga bahin siya sa dalan nalagpot apan demalas ang angkas niini tungod kay sa tuo nga bahin kini nalagpot ug naligsan sa nagsunod nga trak.
Samtang naigo ‘sab sa motor ni Montemayor si Julius Villanueva, taga Guadalupe, Carcar hinungdan nga naka-angkon sab kini og kadaot sa lawas. Ang drayber sa trak nga si Castañares mitahan human sa hitabo. (BANAT NEWS)