CEBU, Philippines – Malinawon ang kalihukan sa kalag-kalag kagahapon sa Metro Cebu.
Si Cebu City Police Office Director Noli Romana miignon nga mingaw ug hapsay karon ang kalag-kalag bisan duna’y pipila nasakpang nagdala og mahait nga hinagiban sulod sa sam-ang.
Gipabilin sa kapolisan ang mga hait nga hinagiban apan giuli sa paggawas sa tag-iya.
Wala’y nagpabadlong sa mga sam-ang matud ni Romana ug wala’y natala nga insidente nga may labot sa kalag-kalag.
Sa dakbayan sa Lapu-Lapu, gihulagway ni Frank Brazil, hepe sa City Traffic Management Systems, nga hapsay ang dagan sa trapiko padulong sa mga sam-ang.
Gituman usab sa mga manindahay nga dili mamaligya tunga sa kadalanan aron dili makabalda sa dagan sa mga sakyanan.
Matud ni Lapu-Lapu City Police Office Director Armando Radoc nga 320 ka polis ang ilang gipakatap palibot sa mga menteryo.
Sa lungsod sa Cordova, si SPO1 Laurencio Wagwag miingon nga duha ka menteryo ang ilang gibantayan nga naglakip sa usa ka pribado ug usa ka publiko.
Si Mandaue City Police Office Director Petronelli Baldebrin miingon nga ang ilang pagbantay sa mga sam-ang sa nagkadaiyang lugar sa dakbyan ilang himuon hangtud karong tungang gabii nga mao usab ang pagpamauli sa mga tawo gikan sa mga sam-ang nga ilang gibisita. (BANAT NEWS)