CEBU, Philippines - Gitaktak ni Mayor Michael Rama ang usa ka babaye’ng kawani sa Cebu City Hall tungod sa pag-post og law-ay nga mga hulagway sa internet.
Base sa Termination Order nga gipirmahan ni Mayor Rama nga giisyu kaniadtong Oktubre 17, ang 54-anyos nga kawani namatud-an nga sad-an sa grave misconduct base sa resulta sa imbestigasyon sa Office of the Resident Ombudsman sa City Hall tungod sa “Repeated Gross Immorality and Dereliction Of Duties.”
Ang mao nga kawani nakadawat na sa termination paper nga giisyu kaniya sa mayor.
Ang hepe sa departamento sa City Hall diin ang mao nga kawani madestino mibutyag nga makadaghan nga higayon nila nga gibadlong ang hingtungdan tungod sa pag-post og mga law-ay nga hulagway sa Facebook, apan wala manumbaling.
Matud ni City Administrator Lucelle Mercado nahitabo ang iyang pag-post og mga pictures sa social networking site nga Facebook sayo pa niining tuiga.
Kahinumdoman nga sayo niining tuiga, ang mao gihapong kawani nalambigit sa usa ka eskandalosong sitwasyon sa usa ka resort sa dakbayan sa Talisay human nga kini ‘gi-rescue’ human gipatumar og drugas sa usa ka langyaw.
Sumala pa nga gipugos kini uban sa usa ka babayeng taga Mindanao pakighilawas sa maong langyaw nga usa ka chemical engineer samtang kuhaan og mga malaw-ay nga hulagway ug video. (BANAT NEWS)