CEBU, Philippines - Dunay daghang kalapasan ang Cebu Doctor’s Hospital nga nasunog diha sa Osmeña Boulevard sa miaging gabii sumala pa ni Cebu City Fire Marshall Rogelio Bongabong. Si Bongabong miingon nga walay sprinkler automatic suppression system ug exhaust fan ang dapit diin magsugod ang kalayo. Midugang si Bongabong nga nag-operate ang maong tambalanan nga walay clearance gikan sa Bureau of Fire Protection.
Gisubay karon ang impormasyon nga dunay nakit-ang nag-welding kilid sa maong hospital.
Miangkon si Bongabong nga pwerteng bagaa sa aso sa lugar hinungdan nga naglisod sila pagsungasong sa sud niini.
Gibanabanang kapin P100 mil ang danyos niini apan gituohan nga mas modako pa kini ini og kahuman sa imbentaryo.
Tungod sa nahitabo, daghang mga empleyado sa Cebu Doctors Hospital ang giingong pugsanong gipa-leave una hangtud sa adlaw’ng Domingo.
Gitug-an ni Hospital Administrator Oscar Tuazon nga wala una’y trabaho ang kasagaran sa ilang mga staff sugod kagahapon apan on duty ang ilang skeletal force ilabi na ang Engineering Department kay panginguhaon nila nga mabalik na sa normal ang ilang operasyon sa Lunes.
“All our patients have been accounted for and we are currently assessing the situation while making the necessary repairs to restore the hospital operations as soon as possible,” matud pa sa pamahayag nga gipadala sa CDUH.
Hinuon pabiling bukas ang Medical Arts Building 2 alang sa konsultasyon ug ingon man ang ilang Out-Patient Department, Laboratory, X-ray, Ultrasound and Minor OR services.
Si Mayor Michael Rama miingon nga gahinan sa siyudad gikan sa 2015 proposed budget nga P19.1 bilyones ang mga bombero sa siyudad.
Matud ni Rama nga buot niyang palitan og gamit nga mokabat P200 milyones ang BFP-Cebu City ug pagtukod og bag-ong fire stations.
Sa laing bahin, duha ka balay ang naugdaw sa Purok 7, Barangay Cubacub, Dakbayan sa Mandaue nga gipuy-an nila ni Roel Evardo, Pedro Evardo ug nakan-an ang balay ni Mercy Evardo.
Gibanabanang mokabat P250 mil ang gibilin nga danyos niini nga milanat lang og tulo ka minutos. (BANAT NEWS)