CEBU, Philippines – Ang pagpahigayon sa seremonya sa haya sa namatay nga tawo ang usa sa nahimong trabaho sa usa ka event coordinator nga si Monica Louisse Socorro Gabutan.
Tinun-an si Monica sa usa ka unibersidad sa dakbayan sa Sugbo apan kung wala’y klase, iyang sideline ang pagka-event coordinator.
Si Monica maoy lider sa grupo nga gitawag og House of Ella diin pito sila kabuok nga mo-organize og kasal, birthday party, uban pa. Aduna‘y kliyente si Monica nga kaslonon nga taga Tabuelan diin nauyonan ang iyang serbisyo ilabi na sa maayong tingog sa ilang event singers.
“Nakauyon sila og maayo, pila ka adlaw human sa ilang kasal, nanawag ang among kliyente ug duna sila’y gihangyo. Namatay daw ang iyang uyoan ug ganahan sila nga nindot ang ihatag nila nga tribute. Gusto nila nga kami ang mo-handle sa necrological service alang sa namatay nila nga uyoan,” saysay pa ni Monica sa Banat News. Nagduha-duha si Monica apan gusto niya nga suwayan ang wala pa nahimo sa grupo.
Gi-research ni Monica ang mahimong dagan sa necrological service uban ang dakung pagsalig nga iya kining mahimo.
Nagmalampuson ang unang pagdala nila og necrological service hangtud ubay-ubay na ang nirekomendar kaniya nga maoy mo-handle sa susamang kalihukan.
Ilang style ang pagkanta matag human og sulti sa tagtungod. Diha’y higayon samtang nagpa-higayon og necrological service, nakasimhot sila og isog nga baho sa kandila ug buwak ug sila nagduda nga naa gyud ang presensya sa kalag samtang gipahigayon ang seremonya. Usa sa dili niya makalimtan nga samtang nag-handle sila og tribute, adunay mga tawo nga nakuyapan gumikan kay nadala sila sa ka “solemn” sa seremonya.
“Dili gani malikayan usaha’y nga makahilak pud ko,” suma pa ni Monica.
May kaubanan usab sila nga motabang sa pag-asikaso sa tagtungod sa mga punenarya.
Dugang pa ni Monica nga isip usa ka event coordinator, gusto niya nga makontento ang iyang mga kliyente. – /GMR) (BANAT NEWS)