CEBU, Philippines - Nalandig sa tambalanan ang tulo ka tawo human aksidente nga mibuto ang shotgun nga isyu sa guwardiya nga nagbantay sa parking area sa usa ka dakong mall sa Barangay Luray Dos, dakbayan sa Toledo.
Ang mga nangaangol mao sila si Gabriel Ipis, 48, taga Barangay Carmen nga samdan sa tuo nga bahin sa aping, Boyet Caligid, 23, nagpuyo sa Barangay Subayon nga nasamad sa tuo nga bukton ug usa ka Reynaldo Toledo, 35, taga Barangay Poblacion nga nakaangkon usab og samad.
Aksidente nga mibuto ang shotgun nga giisyu kang Leodor Acostan diha nga usa ka Alexis Barquin misuway pag-ilog sa armas bisan og walay igo nga hinungdan.
Naglayog sila si Acostan ug Barquin ug aksidente nga mibuto ang shotgun nga nakapaangol sa mga biktima nga diha duol sa mao nga higayon.
Ang guwardiya dali nga mitahan sa kapolisan human sa hitabo samtang nadakpan si Barquin nga maoy misuway pag-ilog sa armas ni Acostan. (BANAT NEWS)