CEBU, Philippines - Nagtinguha ang mga opisyal sa kagamhanan sa dakbayan sa Sugbo nga makigtagbo sa mga opisyal sa dakbayan sa Mandaue aron husayon ang isyu labot sa ihawan nga nahimutang sa North Reclamation Area.
Matud ni Cebu City Administrator Lucelle Mercado nga mahimo karong semanaha nila makaestorya ang mga opisyal sa dakbayan.
“Atong estoryahon mas maayong mag-atubang ta, I’m sure they are not there to quarrel with us neither do we have any quarrel with them,” matud ni Mercado.
Si City Legal Officer Gerone Castillo ang gimandoan pagpahibaw sa mga opisyal sa kagamhanan sa siyudad sa Mandaue.
Ilang estoryahan matud pa ni Mercado kun unsa ang mga demands sa maong dakbayan sa siyudad sa Sugbo ug ang mga ikasugyot usab nila.
Mahinumduman nga nagpadala og suwat ang Mandaue pagpahibaw sa dakbayan sa Sugbo nga wala’y business, sanitary ug mayor’s permits ang ihawan nga nahimutang sa barangay Subangdaku.
Base sa nahaunang taho, nidemanda og P2.9 milyones ang siyudad sa Mandaue isip bayad sa real property taxes alang sa 13 ka tuig nga operasyon sa ihawan.
Apan nagkanayon ni Castillo nga wala’y labot ang mga local government units sa pagbayad og real property taxes base sa section 234 sa Local Government Code of 1991.
Malaumon si Mercado nga human niini mahusay na ang isyu sa duha ka siyudad kalabot sa maong ihawan. (BANAT NEWS)