CEBU, Philippines - Usa ka guwardiya ang nagpusil sa iyang kaugalingon samtang laing usa ang naghikog dinhi sa dakbayan sa Sugbo ug dakbayan sa Toledo, niadtong nakalabay nga adlaw.
Sulod sa Carmen Copper Port sa Daanlungsod sa Toledo City, nakit-an na lang sa iyang kauban nga guwardiya si Reynald Alqueza, 40, nga wa nay kinabuhi. Sa imbestigasyon sa kapulisan sa Toledo nakadungog og buto sa armas gikan sa nahimutangan ni Alqueza ang iyang kauban.
Sa pagsubay sa dapit nakit-an nga nagbuy-od na kini ug dunay samad sa ulo si Alqueza.
Nagtuo ang kapolisan nga gium-om ni Alqueza ang iyang .38 revolver service firearm ug gikablit kini.
Samtang sa dakbayan sa Sugbo, usa ka 47 anyos nga lalaki ang nakit-an na lang nga nagbitay ug patay na sa iyang payag sa ma’y Sitio Olibo, Barangay Buhisan. Ang nagpakamatay naila nga si Franklin Cañada, nga giingong dugay nang mireklamo tungod sa sakit nga tuberculosis.
Nasayran sa kapolisan nga sa miaging adlaw misuway usab kini paghikog apan napakgang sa mga silingan. (BANAT NEWS)