CEBU, Philippines - Gidili ang pagpamolitika atol sa kalihukan sa International Eucharistic Congress karong tuig 2016 nga naatol usab sa tuig sa presidential elections.
Kini ang balik-balik nga pahinumdum ni Cebu Archbishop Jose Palma sa mga politiko nga may tinguha nga gamiton ang kasaulogan sa IEC sa ilang personal nga katuyuan.
Hinuon wala did-i sa simbahan ang mga politiko nga mo-donar alang sa kasaulogan apan kinahanglan usab nga dili na i-special mention ang ilang mga ngan aron mailhan nga sila mi-donar.
Mahimo usab sila nga makaapil sa kasaulogan sa IEC apan si Palma nipahimangno nga dili gamiton ang gahum ug moapil sa IEC sama lang sa mga ordinaryong tawo nga gustong moapil sa kalihukan.
Hinay-hinay na nga nahan-ay sa komitiba sa IEC ang ilang gihimong pagpangandam sa nahisgutang kalihukan sama sa fund raising activity nga gitawag og "Piso Para sa Misa ng Mundo" diin sa Sugbo lang miabot na sa kapin usa ka milyon ka pesos ang ilang natigum.
Ang Pavilion nga gitukod diin usa sa mga venue alang sa IEC gipaabot nga mahuman na sa buwan sa Oktubre sunod tuig.
Mahimo na usab nga makaparehistro ang publiko sa IEC pinaagi sa website www.iec2016.ph ug dili na usab maglibog ug masaag ang mga delegado tungod kay dunay gihimong application diin mahimo nilang ma-download.
Samtang usa usab ka telecommunication company ang mitabang alang sa komunikasyon unya sa IEC 2016. (BANAT NEWS)