CEBU, Philippines – Gipresentar isip testigo si Cebu Vice Governor Agnes Magpale ug ang usa ka NBI agent sa gipahigayong preliminary hearing sa kasong serious illegal detention batok kang Casiano Apduhan, ang gipasanginlang lider sa kulto sa lungsod sa Balamban kagahapon sa hapon.
Si Magpale namahayag sa korte atubangan ni Judge Hermes Montero sa RTC Branch 59 Toledo City nga iya lang gihimo ang trabaho pagtabang kang Emma Nepumoceno, ang babaye nga giingong gitanggong ni Apduhan sa Villa niini sa sitio Laray 3, Barangay Buanoy, Balamban sulod sa dul-an lima ka tuig.
Matud ni Magpale, mireklamo ang inahan ni Emma diha sa Provincial Women’s Commission (PWC) nga iyang gipangulohan. Giingong gi-surveillance pa ang lugar una pa gihimo ang operasyon sa National Bureau of Investigation (NBI-) 7 ug ang Special Weapons And Tactics o SWAT team.
Si NBI supervising agent Rey Villordon mitestigo kun giunsa nila pagluwas si Nepomuceno.
Si Nepomuceno miinsister nga wala siya gitanggong ni Apduhan. Gikatakda nga mopresentar pa og dugang witness si prosecutor Jasmin Despi sa Disyembre 2, 2014. – /EIM) (BANAT NEWS)