CEBU, Philippines – Mokabat sa 17 ka mga armas ang nasakmit sa mga operatiba sa Criminal Investigation Detection Group-7 atol sa ilang operasyon sa Lapu-Lapu Street, Barangay Suba, Danao City nga misangpot sa pagkasikop sa usa ka lalaki.
Ang operasyon gipangulohan sa deputy chief sa CIDG-7, nga si Superintendent Fermin Armendares III human sa usa ka semana nga surveillance sa maong lugar.
Ang nadakpan mao si Rowel Bayo-on, nagpuyo sa mao’ng lugar nga naaktuhan sa mga operatiba nga nag-ayo og mga armas. Apan nakaeskapo ang kauban niini nga si Jose Pintor.
Nakuha sa mga operatiba ang duha ka .38 revolvers gikan ni Bayo-on, samtang si Pintor nakadagan human makita ang mga polis ug gibiyaan ang usa ka sako.
Sa pagsusi sa sud niini duna kini sulod nga walo ka Black Widow caliber .22 revolvers, upat ka .38 revolvers ug tulo ka .9mm pistols. “Mamalit ni si Pintor og armas nga dili pa kaayo finished, unya iyang ihatod ni Bayo-on aron paninduton para mas dako na dayon ang presyo,” sigun pa ni Armendares. – /EIM) (BANAT NEWS)