CEBU, Philippines – Nalandig sa tambalan ang guwardiya sa usa ka mall sa dakbayan sa Bogo human gipuspusan og bara sa sakop sa acetylene gang nga nisuway paglungkab sa maong establesemento kagahapon sa kadlawon.
Sigun pa ni Supt. Germano Mallari, hepe sa Bogo City Police, nga base sa kuha sa close circuit television (CCTV) camera, tulo ka suspek ang nakasulod sa Super Metro Bogo.
Nasayran ang tulo ka suspek nag-abang sa usa ka bakanteng stall tupad sa mall ug matud pa moabot sa P25,000 ang gibayad sa mga suspek sa pag-abang sa lugar nga gipanag-iya ni Delia Ceros.
Sa pagsulod sa tulo ka lalaki ilang nakita ang guwardiya nga si Jerwin Estoya, 31, ug ang usa kanila ang mipuspos og bara sa ulo sa guwardiya dayun sibat.
Buntag na nga nadiskubrehan sa usa sa mga trabahante sa mall ang guwardiya nga nagkadugo ug nagbuy-od sa sawog ug daling gidala sa tambalanan.
Nakuha sa kapolisan ang mga gamit sa tulo ka lalaki sa paglungag pasulod sa mall sama sa hydraulic jack, napulo ka screw driver, mga gabas, cutter ug mga hand drills. Hinuon atol sa pag-inventory sa manager sa mall nga si Ricky Tulda, wala’y nadala ang tulo ka lalaki. – /GMR) (BANAT NEWS)