CEBU, Philippines - Temporaryong ipasirado ang duha ka letsonan og baboy sa dakbayan sa Sugbo tungod kay wala nakabayad sa inspection fee ug business tax.
Si Cebu City Veterinarian, Dr. Pilar Romero, mibutyag kagahapon nga ang Helen’s Lechon sa Banilad ug Torenueva sa Tisa ang temporaryong ipasirado.
Gibutyag ni Romero nga sobra P80 mil ang bayranan sa Helen’s Lechon samtang wala pa matino ang sa Torenueva.
Ang mga letsonan mobayad og P3,000 nga business tax matag tuig ug P50 nga inspection fee sa matag usa ka baboy nga ilang giihaw. Gipasabot ni Romero nga tumong sa temporaryong pagpasira mao nga dili modaku ang ilang utang ngadto sa siyudad.
Subay niini si Romero mibutyag nga magpadala sila og meat inspectors ngadto sa mga negosyante nga dunay private abattoir sama sa mga dagkung letsonan pagseguro nga ang ilang giihaw nga baboy nga ibaligya sa publiko limpiyo ug dili masakiton.
Kadtong mga private abattoir nga wala makatuman sa hygiene ug sanitation ipasirado gyud kini sa City Veterinarian Office. (BANAT NEWS)