CEBU, Philippines - Patay ang usa ka motorista nga nasungag sa gikasugat nga ambulansiya nga nagkarga og pasiyente sa dalan national sa Barangay Jagobiao, Dakbayan sa Mandaue kagahapon.
Si Senior Police Officer 3 Eduardo Flores sa traffic division sa Mandaue City Police Office (MCPO) miila sa namatay nga mao si Alin Russel Soria Catorse, 38, taga Sitio Pajo, Barangay Cansaga, Consolacion.
Ang ambulansiya sa Barangay Tayud gimaneho ni Charlie Quiapo Pepito, 52, padulong maghatod og pasiyente sa Eversely Child Sanitarium General Hospital sa maong lugar dihang nabanggaan niini si Catorse nga gikan sa Cebu City.
Gumikan sa kusog nga impact sa maong panagsungag pwerteng gubaa sa motorsiklo ug atubangang bahin sa ambulansiya.
Way panimuot nga gidala sa Mandaue City Hospital ang biktima sa mga sakop sa Accident Control Emergency Response Team (ACERT) apan gideklarar kini sa doktor nga dead on arrival.
Si Pepito mitahan ngadto sa ilang buhatan human sa maong hitabo ang temporaryo karong gitanggong sa detention cell sa Presinto 3 alang sa pagpasaka og kasong reckless imprudence resulting to homicide batok kaniya. (BANAT NEWS)