CEBU, Philippines – Andam ang Criminal Investigation and Detection Management Group (CIDG-7) nga mohimo og laing imbestigasyon sa kaso sa pagpatay ni Ella Joy Pique.
Kini ang gipadayag sa hepe sa CIDG-7, Sr. Supt. Richie Posadas, human gibasura sa korte ang kaso batok sa usa sa mga akusado sa krimen.
Gitahasan ni Posadas ang chief investigator ug ang provincial officer nga tan-awon pagbalik ang kaso ug makig-alayon sa Cebu Provincial Police Office (CPPO) nga mihimo sa imbestigasyon.
Nagtuo si Posadas nga human gibasura ang kaso batok ni Bella Ruby Santos, angayan lang nga matagaan og insaktong hustisya ang pamilya’ng Pique.
“We should have to start all over again so to speak, magsugod na pud ta, then that would depend kung kadtong decision sa gipagawas sa court,” matud ni Posadas.
Usa sa plano sa opisyal nga ilang estoryahon ang amahan nga si Reynante Pique aron mapasabot ang proseso sa kaso.
Usa sa mga gustong subayon ni Posadas kung kinsa gyud ang mihimo sa pagpatay ni Ella Joy ug asa nga bahin sa kaso nahimong huyang ug posibleng makakita sila og laing testigos. – /GMR) (BANAT NEWS)