CEBU, Philippines – Magtukod og usa ka Biogas Energy Plant ang Philippine Society of Mechanical Engineers (PSME) sa 6.5 ektarya nga relocation site sa Paknaan, dakbayan sa Mandaue.
Kini himuong pilot area nga gitumong dili lang sa paghatag sa mga molupyo og baratong bayranan sa kuryente kun dili makatabang usab sa kagamhanan sa paglabay sa mga hugaw gikan sa pansayan.
Ang 1,200 ka informal settlers gikan sa danger zone areas nga mao’y mo-okupar sa 6.5 ka ektaryang relocation site ang labing unang makapahimulos sa proyekto.
Si Engr. Pableo Senica, Jr. nga maoy nagdesinyo miingon nga gigamit na ang maong proyekto sa mga piggery nga ang hugaw sa baboy gigamit sa pagmugna og enerhiya.
Ang Biogas Energy nga ilang tukuron mahimo usab nga kapahimuslan sa mga kasikbit nga lugar.
Ang proyekto makatabang usab sa solid waste management program sa siyudad diin ang mga hugaw ug mga biya sa mga planta o pabrika lakip sa magamit.
Si Tony Pete Juanico, pangulo sa Housing and Urban Development Office (HUDO) sa dakbayan miingon nga ang proyekto sa PSME Mandaue Chapter daku og matabang sa kahimtang sa pagpuyo sa mga informal settlers.
Matud ni Juanico nga gihangop sa kagamhanan ang maong tinguha sa PSME sanglit daku kini og ikatampo sa pagsulbad sa suliran sa solid waste. – /GMR) (BANAT NEWS)