CEBU, Philippines - Patay ang 100-anyos nga lola human giingong nadakin-as dihang nisuway paggawas sa panimalay sa barangay Matab-ang, dakbayan sa Toledo.
Giila ang maong centenarian nga si Iluminada Orate o mas naila nga si Nanay Dadang, lumad sa maong lugar.
Matud sa anak niini nga si Cristing Orate, 74, nga nahinabi sa Banat News nga adunay nakamatikod ni Nanay Dadang nga nigawas kini sa iyang lawak tungang gabii dihang kalit nga nadakin-as ug daling gitabang.
Human sa pipila ka adlaw, nagmulo na sa kasakit sa iyang likod ug hawak ang lola hinungdan nga ila kining gipapahuway ug planong dad-on sa tambalanan.
Apan niadtong Martes, ilang gipukaw si Nanay Dadang aron pakan-on apan wala na kini mag-ginhawa pa.
Base sa death certificate nga altapresyon ang hinungdan sa kamatayon sa lola.
Niadtong Septiyembre 17 nitakdo sa 100 ang edad ni Nanay Dadang diin gihulagway nga baskog pa.
Gani namugha pa og kahoy, nagsag-ob og tubig, naglung-ag ug manilhig pa si Nanay Dadang kinsa giilang labing taas og edad sa barangay Matab-ang. (BANAT NEWS)