CEBU, Philippines - Gihatagan sa kagamhanan sa siyudad sa Sugbo og 14 ka patrol cars ang Cebu City Police Office (CCPO) kagahapon.
Gisaad ni CCPO Director, Senior Superintendent Noli Romana nga pinaagi niini ilang padaghanon ang presensiya sa kapolisan sa siyudad.
Dugang niya ilang tinguhaon nga mas moubos pa ang crime volume sa dakbayan.
Ang 14 ka sakyanan ipangapod-apod sa 11 ka estasyon sa kapolisan samtang ang tulo ihatag sa special units sa CCPO.
Matud ni Police Regional Office-7 Director Prudencio Bañas nga dako kini og tabang sa siyudad labi na nga nagkadaghan ang mga tawo. Daku ang pasalamat ni Bañas ug Romana sa kagamhanan sa dakbayan ug ilang gisaad nga ampingan ang maong mga sakyanan ug gamiton lang kun asa kini angayan nga gamiton.
Matud ni Konsehal Dave Tumulak nga nagkantidad og P10 milyones ang 14 ka sakyanan.
Aduna pa’y ipuno nga 30 ka sakyanan ug siyam ka mga motorsiklo ang siyudad alang sa CCPO .
Matud ni Mayor Michael Rama nga gikinahanglan kini aron mas mabuhat sa kapolisan ang ilang responsibilidad sa pagpabiling hapsay sa siyudad.
“How can our policemen make it safe and secured if they do not have the mobility, they do not have the requirement that will equip, then they will only good as what they have,” matud ni Rama. (BANAT NEWS)