CEBU, Philippines - Gikawat sa wala mailhing tawo ang P200 mil sa usa ka polis nga giandam unta alang sa iyang birthday karong adlawa human gilungkab ang iyang giabangan nga boarding house.
Ang biktima mao si PO3 Lee Marinduque, 43-anyos nga sakop sa Police Center for Aviation Security sa Mactan-Cebu International Airport
Lakip sa gikawat ang ang M-16 rifle sulod sa kwarto sa biktima sa sitio Fatima, Pusok, dakbayan sa Lapu-Lapu niadtong Martes sa hapon.
Si Marinduque nagkanayon nga nakahibawo siya sa panghitabo pinaagi sa text sa iyang boardmate nga si Ruby Calimposan.
Matud ni Marinduque nga nilakaw siya alas 8 sa buntag nga nagsul-ob og barong atol sa send-off kang Philippine National Police Director General Alan Purisima.
Matud sa polis nga gawas sa nagdali siya sa oras, wala niya gidala ang M-16 high-powered firearm kay nagsul-ob siya og barong. Gipahibawo siya ni Calimposan alas 3:45 sa hapon nga abli na ang pultahan sa kuwarto, guba ang doorknob ug buak ang semento duol sa doorknob. Gihangyo ni Marinduque si Calimposan nga ipasusi ang lawak apan wala na’y naabtan nga tawo.
Daling niuli si Marinduque sa boarding house ug maoy naabtan ang nabungkag na nga mga butang apan ang laptop ibabaw sa kutson ang wala natandog. Ang P200 mil tinigum ni Marinduque sa iyang negosyo ug alang unta sa iyang birthday karong adlawa. (BANAT NEWS)