CEBU, Philippines - Giklaro ni Gobernador Hilario Davide III nga way kalabutan ang probinsya sa mga operasyon sa kanhi enforcement team leader sa Anti-Illegal Fishing Task Force sa Kapitolyo nga si Loy Anthony Madrigal, kinsa giingong nagtrabaho na karon sa munisipyo sa Santa Fe, sa Isla sa Bantayan.
Niadtong Lunes, duha ka fishing vessels nga adunay dala nga mga active gears ang nasikop sa lungsod sa Daanbantayan. Giubanan ni Madrigal ang mga miyembro sa Bantay Dagat sa lungsod sa San Remigio, Sta. Fe, ug Daanbantayan sa maong operasyon. Si Madrigal nagkanayon nga wa siya nagduhaduha sa pagtubag sa hangyo sa munisipyo sa Daanbantayan sanglit iya usab nasuta ang pagdaghan og balik sa mga illegal fishers.
Gisuwayan og pagtawag sa Banat News si Santa Fe Mayor Jose Esgana aron pagkompirmar sa employment status ni Madrigal apan wa kini makontak.
Matud ni Davide nga gipahibalo siya ni retired Col. Romeo Tabayan, ang bag-ong hepe sa Anti-Illegal Fishing Task Force sa Kapitolyo mahitungod sa operasyon.
Kahinumdoman nga miluwat sa ilang trabaho sa Kapitolyo si Madrigal ug iyang sekretarya niadtong miaging buwan human mikatap sa social media ang ilang hulagway diin makita nga misandig sa abaga ni Madrigal ang iyang sekretarya nga minyo na. Gipaluwat ni Davide si Madrigal sa iyang katungdanan gumikan usab sa isyu sa imoralidad. (BANAT NEWS)