CEBU, Philippines – Nakatulog og prisohan ang usa ka 38-anyos nga babaye human gipadakop sa iyang bana human kini nasakpan nga duna’y lain nga gikadulog nga lalaki sulod sa usa ka giabangan nga balay sa lungsod sa Consolacion.
Ang 38-anyos nga bana nagpatabang sa kapulisan tungod sa pakigrelasyon sa iyang asawa og laing lalaki nga taga Borbon ug nagpuyo sa maong lugar.
Ang Banat News dili lang mohingalan sa magtiayon alang sa proteksyon sa ilang lima ka anak ingon man sa lalaking gikarelasyon sa ginang nga usa ka drayber sa habal-habal.
Ang bana nakadawat og impormasyon nga nikuyog ang iyang asawa sa balay sa lalaki hinungdan nga nagpakuyog kini og mga pulis ug gi-adto ang maong balay.
Sulod sa balay nasakpan g’yud sa bana ang iyang asawa ug ang lalaki nga nagdulog hinungdan nga iyaha kining gidakop. Apan pagkaalas-12 sa udto kagahapong adlawa gipasaylo sa bana ang iyang asawa ug ang lalaki apan kinahanglang dili na kini mamasahero sa Consolacion.
Ang asawa kinahanglan usab nga didto na mouli sa balay sa iyang inahan ug gibaharan nga dili na makigkita sa maong lalaki. Si Senior Police Officer 1 Francisco Perez Jr., sa Consolacion Police nga nahinabi sa Banat News mitug-an nga naluoy ang bana sa iyang mga anak kung mabilanggo ang iyang asawa. - /EIM) (BANAT NEWS)