CEBU, Philippines – Usa ka amahan ang miunay og patay sa iyang tulo ka mga gagmay nga anak, lakip na sa iyang ugangan ug pagkahuman nagdunggab sa iyang dughan ug nakabsan ‘sab sa iyang kinabuhi diha sa Sitio Manlayag, Barangay Panalipan, lungsod sa Catmon kagahapon sa hapon.
Ang suspek nga amahan naila nga si Eric Figues, 27, samtang ang iyang mga anak nga iyang gipamatay mao sila si Estephanne Figues, 6, nga nagsaulog sa iyang adlaw nga natawhan kagahapong adlawa, John Eric Figues, 4, Erica Lynn Figues, 2, samtang ang iyang ugangan nga si Emilda Enad Molat, 47.
Sa imbestigasyon sa kapulisan sa maong lungsod nasayran nga usa ka double bladed “dagger knife” ang gigamit sa suspek sa pagpatay sa mga biktima, ug gidunggab sa iyang kaugalingon. Base sa report sa kapulisan sa Catmon samad dinunggaban sa dughan ang gikamatyan sa mga biktima. Matud pa ni Police Officer 3 Ben Navales sa Catmon Police nga nahinabi sa Banat News mitug-an nga nagduda silang tiggamitan og drugas ang amahan sa mga bata.
Sigun pa ni Navales ang ugangang lalaki sa suspek nakadungog nga misinggit ug nangayo og pasaylo si Eric sa ugangan nga babaye.
Dali kining gisusi sa sud apan misugat kaniya sa iyang mga apo, si Emilda ug ang suspek nga pulos nagkadugo ug patay na. Wala sa ilang balay ang inahan sa mga bata tungod kay nagtrabaho sa dakbayan sa Lapu-Lapu.
Sigun pa ni Navales kanhi konduktor sa bus ang suspek apan miundang og trabaho tungod kay giingong dunay gustong mopatay kaniya. -/EIM) (BANAT NEWS)