CEBU, Philippines - Demolison na ang kabalayan sa Mahiga Creek sa habig sa Subangdako karong adlaw nga Martes.
Lakip sa demolison ang gipangtukod diha sa bukana sa maong sapa nga gilangkoban sa Block 27 duol sa SM Hypermarket nga ang pikas tampi nga atbang niini sakop na Cebu City.
Sumala pa ni kanhi Cebu City Councilor Jose Dalus nga maoy pangulo sa Cebu City River Management Council nga gitudlo usab nga maoy opisyal nga tigpamaba sa duha ka lokal nga kagamhanan nga naglambigit sa isyu sa Mahiga Creek.
Gitug-an ni Daluz nga mangayo sila og police backup isip crowd control atol sa pagdemolis sa mga estraktura.
Hinuon may mga residente nga miboluntaryo na og guba sa ilang mga panimalay tungod kay ang kadaghanan kanila naapil man sa benepisyaryo sa 6.5 ka ektarya nga relocation site sa Barangay Paknaan.
Si Mandaue City Legal Officer Giovanni Tianero mipatawag na sa mga lumolupyo nga naapektohan ug giawhag silang daan pagbiya na sa maong lugar ug mamalhin na ngadto sa ilang relocation site.
Sa nasayran nga ang habig sa dakbayan sa Sugbo sa Mahiga Creek, dugay na nga gihawanan sa mga ilegal nga estraktura sa mga sakop sa Reduce Eliminate Danger Zones (REDZ ).
Subay sa balaod, gidili ang pagtukod og bisan unsang estraktura sulod sa tulo ka metros gikan sa mga tampi sa kasapaan, ang mga estrakturang ilegal nga gitukod sa mga kasapaan maoy gibasol sa hinungdan sa pagbara sa mga basura ug moawas ang tubig panahon nga kusog ang uwan.
Nabutang usab sa peligro ang mga kinabuhi sa mga nagpuyo niini tungod sa posibilidad nga maanod ang ilang mga balay. (BANAT NEWS)