CEBU, Philippines - Makapahigayon na og pagpangopera ang Toledo City Hospital human giduso sa konseho ang paghimo niini nga Level 1 hospital.
Lakip niini ang appendectomy ug uban pa nga operasyon nga mahimo sa Level 1 hospital.
Gikatakda karong buwana ang pag-upgrade sa maong tambalanan.
Adunay P25 milyones nga gitagana ang nasudnong kagamhanan pinaagi sa Department of Health diin ang P20 milyones alang sa reconstruction ug laing P5 milyones alang sa mga ekipo sa tambalanan.
Nigahin usab si Toledo City Mayor John Henry Osmeña og laing P10 milyones nga pondo alang sa pagpalit og dugang gamit ug kahimanan sa hospital.
Napahigayon na usab ang pre-construction conference tali sa DOH, Mayor Osmeña, Bise Mayor Antonio Yapha Jr. ug kontraktor. (BANAT NEWS)