CEBU, Philippines - Gipasakaan og reklamo ngadto sa Civil Service Commission-Region VII si Cebu City Treasurer Diwa Cuevas tungod sa giingong kalapasan niini sa pagpagawas og pundo gikan sa panudlanan sa gobiyerno.
Si kanhi kongresista Tomas Osmeña mibutyag sa mga tigbalita kagahapon nga 12 ka reklamo ang iyang giduso sa milabay’ng semana ngadto sa CSC batok kang Cuevas.
Usa sa maong reklamo mao ang kabahin sa pagpagawas og pundo ni Diwa niadtong Disyembre 31, 2012 diin uban niini wala ma-record. Niadtong higayona si Diwa maoy city accountant sa dakbayan sa Sugbo.
Si Osmeña mibase sa report sa Commission on Audit (COA) diin miluwat kini og “adverse opinion” sa gisumitir nga records sa siyudad ngadto sa COA niadtong tuig 2012 tungod kay giingong dunay irregularity, insufficient ug omissions sa mga records sa transaksyon sa siyudad lakip na sa accounting department nga gipangulohan kaniadto ni Cuevas.
Si Osmeña nagkanayon nga ang city accountant wala motuman sa balaod, mibahad pa gyud kini nga kung walay mahitabo sa kasong administratiba mopasaka na siya og kasong kriminal batok kang Cuevas.
Si Cuevas sa iyang bahin, mikwestiyon nganong siya lang ang gipasakaan og kaso. Gibutyag ni Cuevas nga tulo ka sunod-sunod nga tuig ang COA miluwat og “adverse opinion” sa siyudad.
Gibutyag ni Cuevas nga nasalo ra niya ang maong problema , matud niya bisan kinsa pay mopuli sa iyang posisyon magpabilin ang problema kung ang records dili kini ma-correct.
Dugang ni Cuevas nga katunga sa tuig 2011 ubos pa sa termino ni Osmeña kinsa dili pa siya maoy accountant. (Brenda D. Batuto/EIM)(BANAT NEWS)