CEBU, Philippines - Makadawat og tag P50 mil ang tulo ka senior citizens sa dakbayan sa Mandaue nga nag-edad na og kapin sa 100 atol sa pagtapos sa Elderly Week karong Oktubre 4.
Naglakip sa tulo nga pasidunggan mao sila si Cristita Velasquez Del Mar sa Wireless, Subangdaku kinsa mag-101 na sa mao usab nga adlaw.
Ang ikaduha mao si Serapio Sanchez Lumapas nga taga Mantuyong kinsa takdo nga 100 na ang panuigon niadtong Septiyembre 3.
Samtang ang ikatulo mao si Dolores Ermac, 106-anyos nga taga Casuntingan.
Sila si Mandaue City Mayor Jonas Cortes ug Bise Mayor Glenn Bercede ug ubang opisyal ang motunol sa pasidungog nga ipahigayun sa Mandaue City Sports and Cultural Complex.
Pinangulohan ni Perfecto Perilla, ang federation president sa kahugpongan sa mga senior citizens, kapin sa 2,000 ang nanambong sa pagbukas sa kalihukan sa Elderly Week Celebration sa dakbayan sa Mandaue kagahapon. (BANAT NEWS)