CEBU, Philippines - Gikulata pa ug gikawatan ang usa ka 46-anyos nga babaye dihang nisukol sa upat ka kawatan nga misaka sa iyang balay sa Purok Manga, Tayud, Liloan.
Si Jeanette Dabalos kinsa natulog sa sala sa ilang balay ang gigapos dihang nisulod ang mga kawatan samtang ang bana ug mga anak nga nakatulog sa pikas kwarto ang wala gyud nakabantay sa hitabo alas dos pasado sa kadlawon sa niaging adlaw. Ang upat ka lalaki armado dihang daling nigapos ug nitaptap sa mga mata sa biktima ug gikulata dihang misuway og lugnot.
Gisakiyo sa mga kawatan ang duha ka pares nga sapatos kantidad P9,000, tulo ka cellphone kantidad og P43,000, laptop nga P40,000, tulo ka singsing nga P20,000, digital camera nga P18,000, kwarta nga P7,500, relo nga P5,000 ug mga ATM ug credit cards.
Ang biktima gidala sa comfort room sa ilang balay ug gibiyaan sa mga kawatan. Samtang nagpakitabang sa Fuente Police ang usa ka langyaw human gilungkab ang coffee shop niini sa may General Maxilom Avenue, dakbayan sa Sugbo.
Ang nidangop sa kapolisan naila nga si Sang-un Kim, usa ka Korean, 23, ug kasamtangang nagpuyo sa San Nicolas.
Nakita sa close circuit television (CCTV) camera nga duha ka lalaki ang sakay sa motorsiklo nga mihunong atubangan sa Coffee Bean Scent ug milipot sa likod nga pultahan diin didto miagi.
Nakuha sa mga kawatan ang P120,000 nga kuwarta nga gibutang sa drawer lakip na ang cellphone ug duha ka laptops nga mikantidad og P100,000.
Sumala pa ni Chief Insp. Wildemar Tiu, hepe sa Fuente Police nga nahinabi sa Banat News, nga duda sila nga posibleng may kontak sulod sa maong coffee shop ang mga kawatan human nga nakahibawo nga may kuwarta nga gibutang sa drawer. Sa dakbayan sa Talisay, gilungkab ang usa ka balay nga gipanag-iya ni Roqueta Calinga, 60-anyos, sa Sta. Theresa Village Oldog, Cansojong.
Nakuha gikan sa panimalay ni Calinga ang duha ka laptops, mga alahas, kuwarta balor og P100 mil, bank book, mga cellphones ug upat ka relo. Si SPO1 Yvonne Illustrisimo miingon nga si Calinga personal nga nisugilon nga gibuslutan sa mga kawatan ang ilang kisame aron makasulod. (BANAT NEWS)