CEBU, Philippines - Gidakop sa kapolisan ang 39-anyos nga lalaki human gialarma nga nang-hostage sa iyang inahan sulod sa ilang balay pasado alas 11 sa buntag kagahapon sa Naya Village, Tisa, dakbayan sa Sugbo.
Apan matud pa ni Chief Insp. Arthur Dela Rosa, hepe sa Punta Princesa Police nga wala’y pagpang-hostage nga nahitabo.
Sumala pa ni Dela Rosa nga igo lang gimandoan ni Oscar Alleonar ang iyang igsuon nga si Rey ug ilang katabang nga mogawas sa balay samtang gipabilin ang inahan nga si Virgie, 70-anyos.
Daling miresponde ang mga sakop sa Special Weapon and Tactics (SWAT) ug Punta Princesa Police.
Nasuta nga si Oscar ang didto lang sa iyang kuwarto samtang ang inahan ang didto ra sab sa iyang lawak.
Wala’y nakita nga hinagiban ang kapolisan gikan sa suspek kinsa boluntaryong mi-surender sa mga operatiba.
Nasuta nga ang suspek ang gawas sulod lang sa rehabilitation center. Kagahapon sa buntag gikatahong nag-away ang suspek ug igsuon.
Gumikan sa kahadlok sa inahan, misulod kini sa iyang lawak ug nanirado. (BANAT NEWS)