CEBU, Philippines – Nasikop sa City Intelligence Branch (CIB) sa Cebu City Police Office (CCPO) ang gitumbok nga usa sa mga mitulis sa Gas station sa Talamban sa niaging semana diin nadala sa mga tulisan ang shotgun sa guwardiya ug salaping cash nga kapin sa P18 mil. Atubangan sa mga tigbalita gipresentar sa director sa CCPO, Senior Supt. Noli Romana ang suspek nga si Melvin Roble, 33, ulitawo nga taga sitio Beavers, T. Padilla.
Matud pa ni Romana nga ilang nadumduman ang gipuy-an sa suspek human usa ka impormasyon ang ilang nadawat gikan sa usa ka concern citizen.
Atol sa pagsikop sa suspek, niadtong Domingo sa udto sa ilang panimalay, nakuha sa kapolisan ang usa ka 357 revolver nga dunay tulo ka bala, usa ka granada ug mga drug paraphernalia.
Nasuta nga bag-o lang sab nakagawas sa bilanggoan ang suspek gumikan sa kaso sa ilegal nga drugas ug giingong sakop sa usa ka lokal nga grupo sa mga badlungon sa dakbayan.
Samtang ang hepe sa CIB, Supt. Romeo Santander, mitug-an nga positibong gitudlo gyud sa pumpboy sa maong gas station ang suspek nga maoy misulod sa cashier’s room ug mikuha sa kuwarta.
Apan ang suspetsado nga nahinabi sa mga tigbalita ang hugtanong mihimakak sa pasangil.
Matud ni Roble nga atol sa hitabo, didto lang siya sa ilang balay ug natulog ug saksi ang iyang mga silingan.
Hugtanon sab nga gihimakak ni Roble nga iya ang nakuha nga armas ug granada apan giangkon niini ang mga drug paraphernalia.
Gumikan sa pagkasikop sa suspek ug nakuhaan kini og granada, gibutyag ni Romana nga kini dili na gyud makagawas sa bilanggoan gumikan ang maong salaod nga paghupot og granada, wala’y piyansiya.
Padayon pa nga gipangita sa kapolisan ang laing kauban sa suspek. -/GMR) (BANAT NEWS)