CEBU, Philippines – Ika-26 ka tuig nga kasumaran sa pagkamatay ni Monsenyor Teofilo Camomot gisaulog pinaagi sa usa ka Santos nga Misa didto sa mother house sa Daughters of Saint Teresa.
Gikan buntag hangtud hapon, walay puas ang pag -abot sa mga tawo nga nag-ampo pagpangayo sa tabang ni Bishop Teofilo Camomot nga naila sa iyang pagkamanggihatagon sa buhi pa kini.
Sumala pa nga duna pay pipila nga nangaayo sa ilang balatian human nila gipangayo ang pagpangamuyo ni Bishop Camomot.
Si Monsenyor Puno kinsa bag-ong nadestino sa Carcar City mipadayag sa iyang kalipay ug garbo nga anaa siya mag-alagad karon sa simbahan sa lugar diin magikan ang umaabot na usab nga santo.
Si Monsenyor Boy Alesna kinsa maoy nangulo sa Santos nga Misa mipadayag sa iyang homiliya ngadto sa mga layko, kaparian, mga madre ug sa mga relihiyosong pundok nga dili kalimtan ang mga maayong mithi ni Monsenyor Camomot.
Mitambong usab ang mga opisyal sa Carcar City lakip na si Board Member Julian Daan kinsa usa usab sa nagtuo nga nakadawat sa panabang ni Bishop Camomot niadtong siya grabe nga nasakit.
Dako kaayo iyang pagsalig nga ang pagpangamuyo niya kang Bishop Camomot nga siya tabangan ngadto sa Kahitas-an maoy nakapaayo sa iyang grabe nga sakit.
Si Bishop Camomot nga lumad nga Carcaranon namatay sa aksidente sa iyang sakyanan sa Bario Baho sa lungsod sa San Fernando Septiyembre 27,1988. Siya unang gilubong sa sam-ang publiko sa Carcar apan gibalhin niadtong tuig 2009 sa Mother House sa Daughters of Saint Teresa nga iyang gitukod sa buhi pa kini.
Didto sa mosuleyo ni Camomot makita ‘sab ang gipang-preserbar niya nga mga gamit apil na sa iyang higdaanan sa higayon nga moanha siya sa Mother House. Sa pagkakaron giproseso na ang beatification ni Monsenyor Teofilo Camomot didto sa Vatican. -/EIM) (BANAT NEWS)