CEBU, Philippines – Nakaangkon og samad pinusilan ang usa ka suspetsadong tulisan human gipusil sa nakarespondeng polis dihang nanulis sa barangay Poblacion, dakbayan sa Toledo.
Giila ang suspek nga si Ernesto Canoy, 41-anyos, nga taga barangay Calong-calong nga nagpakaaron-ingnon nga guwardiya dihang nagsul-ob kini og uniporme sa sikyu ug peluka (wig).
Base sa imbestigasyon nga duha ka babaye nga sila si Mary Jane Villanueva, 37, taga barangay Awihao ug Marietta Calunsag, 47, taga barangay Ibo ang gitulis sa suspek.
Nasayran nga samtang naglakaw ang mga biktima kalit nga giduol sa tulisan ug giti-onan sa dala nga sumpak.
Wala makontento ang tulisan gipabuthan ang mga biktima sa dala nga sumpak ug swerte na lang kay ang bag sa usa sa mga biktima ang naigo.
Daling nakasiyagit ug nakapangayo og tabang ang mga biktima diin ang off duty nga polis nga si SPO4 Alan Barquin ang nakaresponde.
Misuway sa pagkarga og bala ang suspek sa iyang sumpak hinungdan nga nipabuto og warning shot si Barquin apan nagmagahi ang suspek.
Napugos sa pagpusil si Barquin sa suspek hinungdan nga naigo kini sa walang bahin sa tiil hinungdan sa iyang pag-surender. -/GMR) (BANAT NEWS)