CEBU, Philippines - Wala’y epekto sa Land Transportation Office (LTO-7) ang gitakdang lihok protesta sa mga sakop sa Pinagkakaisang Samahan ng mga Tsuper Nationwide (PISTON).
Ang officer-in-charge sa LTO-7, Arnel Tancinco, mipasabot nga igo lang sila mipatuman sa kamandoan samtang wala’y mando sa temporaryong pagsuspenso niini.
Si Greg Perez, coordinator sa PISTON sa Sugbo, miingon nga lakip sa tumong sa protest rally mao ang pagsupak sa 12 porsiyentong Valued Added Tax ug lokal nga ordinansa.
Si Romeo Armamento, Visayas coordinator sa National Confederation of Transport Workers Union (NCTU) ug presidente sa Mandaue United Drivers Association (MODA), miingon ang ilang pundok gibati usab og kahingangha sa gihimo sa LTO-7.
Gisanong sa Department of Transportation and Communications (DOTC) ang reklamo hinungdan nga nagpadayun ang pag-review sa Joint Administrative Order (JAO).
Si Tancinco sa iyang pagpasabot kang Armamento miingon nga ilang gihimo ang operasyon tungod sa daghang reklamo nga nadawat batok sa abuso sa mga drayber sama sa dili pagpasiga sa suga ug ang depektoso nga accessories niini. (BANAT NEWS)