CEBU, Philippines - Dunay ubang drayber nga kun makakita og ambulansya nga kusog nga magdagan paingon sa ospital mogukod aron mopaspas ang iyang pagbiyahe, ilabi na kun masuta nila nga susama siya og padulngan nga lugar sa ambulansya nga iyang gisunod.
Dili kini husto ug mahimong madakop ang mao nga motorista. Ang tukma nga buhaton sa mga motorista nga makadungog og siren, ilabi na gikan sa police patrol car nga nagresponde og mga alarma o kaha ambulansya nga maghatod og pasyente sa ospital, mohunong ug paagion ang nagsiren, dili kay mogukod.
Ang Section 49 sa Republic Act 4136, ang Transportation and Traffic Code (right of way for police and other emergency vehicles), naglatid g’yud nga ang mga motorista nga makadungog sa siren angay nga mopadaplin, unya mohunong.
Kun moagi na ang police patrol car o ambulansya nga nagsiren, anha pa nga higayona nga sila mopadayon sa pagpadagan. Ang Banat Manobela makadaghan na makasaksi nga dunay mga sakyanan, sagad mga motor, nga mogukod sa mga ambulansya.
Kini nga binuhatan maisip nga reckless driving nga dako na kaayo’g multa. (RUB) (BANAT NEWS)