CEBU, Philippines - Usa ka minero ang naangol human nga nahugno ang minahan nga iyang gitrabahoan sa lungsod sa Dalaguete buntag niadtong adlaw nga Lunes, didto sa Sitio Canlawilao, Barangay Dumalan sa maong lungsod.
Kini ang gitug-an ni Junry Tenefrancia ang usa sa mga opisyal sa Local Disaster Risk Reduction and Management Council nga nahinabi sa Banat News.
Matud pa ni Tenefrancia nga usa ka Guillermo Beldiniza, 45, nagpuyo sa maong lugar nga trabahante sa Ibalong Resources and Development Corporation ang naangol sa maong hitabo.
Sumala pa ni Tenefrancia nga basi sa ilang nakuha nga impormasyon nagmuntar og mga gamit ang mga trabahante sa maong lugar dihang kalit lang nahugno ang bungbong sa tunnel ug natagakan si Beldiniza sa iyang nawong ug tiil.
Dali siyang gidala sa Julio Cardinal Rosales Memorial Hospital apan gumikan sa grabeng kadaot nga naangkon sa iyang lawas gibalhin kini sa usa ka pribadong tambalanan sa dakbayan sa Sugbo. Gitug-an pa ni Tenefrancia nga ilaha na nga gipangayoan og incident report ang maong kompanya aron matan-aw kung duna silay mga lapso ug masilotan ang angayang silotan.
Ang Ibalong Resources and Development Corporation ang usa lang sa duha ka mga dagkong minahan nga nag-operate sa maong lugar, sigun pa ni Tenefrancia. (BANAT NEWS)