CEBU, Philippines - Patay na nga nakita sa iyang mga paryente ang usa ka 68-anyos nga lolo nga naligo sa iyang kaugalingon nga dugo ug duna’y dakung samad sa ulo sa Sitio Upper Malunog, Barangay Malubog, Cebu City, kagahapon sa buntag. Ang biktima naila nga si Demetrio Codezar, nag-inusara nga nagpuyo sa iyang payag sa maong dapit ug nagsilbi nga tigbantay sa mga motorsiklo sa mga tawo nga nagpuyo sa taas nga bahin sa maong dapit.
Matud pa nila ni Police Officer One Michael Angelo Singson ug Police Officer One John Errick Samosa sa Homicide Section sa Cebu City Police Office nga nahinabi sa Banat News, posibleng gipatay ang biktima sa tawong nikawat sa usa sa gibantayan niining motorsiklo. Pasado na alas- 7 sa buntag sa dihang usa ka Randy Felociano, paryente sa biktima, ang nakabantay nga patay na si Codezar.
Gikatahong tulo ka motorsiklo ang gibantayan ni Codezar apan nawala na ang usa nga usa ka Honda Wave niini samtang ang usa ka motorsiklo gisuyakan ang ligid.
Sa ulohan sa biktima duna’y atsa nga nakita ang mga pulis ug sa kilid sab niini dunay sundang apan sumala pa sa kapulisan wala sila’y nakita nga dugo. Nagduda ang kapolisan nga posibling gabii pa gihimo ang krimen.
Hangtud ning pagbalita, wala pay kasayoran ang kapolisan kun si kinsa ang maong mga kawatan. (BANAT NEWS)