CEBU, Philippines - Usa ka 12-anyos nga bata ang napalgang patay na human maanod kini sa baha didto sa lungsod sa Medellin pasado alas- 3 sa hapon niadtong adlaw’ng Biyernes.
Sa pakighinabi sa Banat News, gibutyag ni Medellin Mayor Ricardo Ramirez nga napalgan na nga wa nay kinabuhi ang lawas sa biktima nga ginganlan og Dodong Torino, 12, nga naglutaw sa Bangon Creek sa maong lungsod.
Dugang ni Ramirez nga aduna siyay nadawat nga impormasyon nga giingong gisugo sa pagpangumpay ang maong bata ug miadto sa sapa sa Sitio Comon, Barangay Daanlungsod kauban ang laing pito ka mga bata. Sigon pa sa mayor, duna pay salin nga tubig ang sapa nga giadtoan sa mga bata aduna pay tubig baha gikan sa kusog nga pag-uwan niadtong Miyerkules hangtod Huwebes.
“Salin to sa uwan. Unya modagan pa g’yud na og duha ngadto sa tulo ka adlaw una pa mohubas ang maong sapa. Kompiyansa ra siguro sila nga nagduwa or nangaligo ba,” matud ni Ramirez.
Giingong gisuwayan pagbira sa mga kauban si Torion aron mapugngan kini sa pagkaanod apan napakyas ang mga bata. Tungod ba kaha sa kahadlok, wala mamauli ang mga bata ug adto midiretso sa balay sa ilang apohan sa Poblacion.
“Ang mga ginikanan sa pagkahibalo nga nakit-an ang naanod nga bata, nangalisang pud kay wa pa mauli ang uban,” sumala pang Ramirez.
Alas- 7 na sa gabii niadtong Biyernes nahibaw-an nga ang giulian sa mga bata mitug-an nga nangahadlok silang mamauli sa ilaha tungod sa nahitabo kang Torion, matud ni Ramirez sa post sa iyang Facebook account.
Ang kagamhanan sa Medellin mihatag og hinabang sa pamilya sa bata nga naglakip sa usa ka sako nga bugas ug misaad nga motabang sa paglubong sa biktima. Gihangyo ni Ramirez ang mga ginikanan nga dili mokompiyansa bisan og nahunong na ang ulan. (BANAT NEWS)