CEBU, Philippines - Patay na nga nakita sa mga residente sa barangay Tambongon, San Remigio, Cebu ang usa ka 70-anyos nga lalaki nga naanod sa dagat kagahapon sa alas 2 sa hapon.
Didto na sa kabakhawan sa maong barangay nakaplagan ang patay nga lawas ni Melanio Salvador dihang gipangita sa rescue team sa maong lugar.
Matud ni PO2 George Cataraja, desk officer sa San Remigio Police nga kuyog ni Salvador ang iyang duha ka pag-umangkon ug silingan dihang miadto sa baybayon aron mangisda.
Sumala pa ni Cataraja nga atol sa pag-uli sa grupo, mitaas na ang tubig nga halos moabot na sa ilang dughan samtang sila naglakaw ug kalit lang naanod si Salvador gumikan sa bul-og sa dagat.
Ang mga kauban dali pa unta nga nangita sa biktima apan miabot na lang ang kagabhion wala gyud nila nakita ug buntag na nga nakaplagan sa may kabakhawan ug wala na’y kinabuhi. (BANAT NEWS)