CEBU, Philippines - Ang Casa Gorordo Museum tak-opan sugod Septiyembre 20 kay sugdan ang pagpalambo niini.
Ang Ramon Aboitiz Foundation, nga maoy nagdumala sa museyo, nagbuhat sa ingon aron pagpanindot pa sa Casa Gorordo Museum lakip na ang iyang shop.
Ang museyo unya may bag-o nang paagi sa pagpasundayag sa mga display ug adunay dugang nga mga galleries nga mas makalingaw ug mas masabtan sa mga bisita.
Bisan kun sirado ang museyo, padayon gihapon ang iyang mga programa, exhibits ug uban pang mga kalihokan nga ipahigayon sa laing mga lugar.
Ang Kabataan, Kultura ug Kabilin ug ang Kids at the Museum, pananglitan, mahitabo gihapon karong buwana ug sa Oktubre. Ang Casa Gorordo Museum subhan pag-usab karong umaabot Mayo 2015.
‘Bagis’ sa Dalaguete nadakpan
Nasikop sa mga sakop sa kapolisan sa lungsod sa Dalaguete ang usa sa mga gitumbok nga suspek sa suway nga pagpatay sa usa ka 64-anyos nga lolo sa miaging semana sa susamang lungsod. Ang nasikop naila nga si Odelio “Bokoy” Salonoy, hingkod, molupyo sa Barangay Jolomaynon sa lungsod sa Dalaguete.
Si PO2 Reynaldo Vidas, desk officer, nga nahinabi sa Banat News miingon nga pasado alas 11:00 sa miaging buntag nakadawat sila og impormasyon sa usa ka texter nga si Salonoy naa sa balay sa usa ka Esther Orozco sa Barangay Poblacion.
Sila si SPO3 Cleo Pia, PO3 Rodrigo Teo, PO2 Gerald Toquero, ug si PO2 Arnel Calisang maoy nakadakop kaniya.
Usa ka .357 revolver nga may unom ka bala, duha ka cellular phones, duha ka medium size nga paketeng gituohang shabu, backpack nga may sulod nga usa ka granada ug usa ka magazine nga may unom ka bala sa .45 kalibre ang nakuha kaniya.
Ang suspek mao ang usa sa mga mipusil ni Honorato Quevedo sa Barangay Jolomaynon. Napasakaan na og kasong attempted murder ang suspek dugang sa laing kaso pa nga pagpamusil sa ilang lungsod. (BANAT NEWS)