CEBU, Philippines – Parehong nalandig sa tambalanan ang biktima sa pagpanunggab ug ang suspek human nakasukol ang biktima nga usa ka conductor. Ang insidente nahitabo sa may M.J Cuenco Avenue, Mabolo, dakbayan sa Sugbo alas 12:20 sa kadlawon niadtong nakalabay nga adlaw.
Ang biktima naila nga si Jose Bugtong Alajid, 35, taga Quijano Compound, Calamba, dakbayan sa Sugbo samtang ang suspek naila nga si Reul Lindangan, taga Mabugat, Tabok, dakbayan sa Mandaue.
Matud ni SPO4 Rey Cuyos, imbestigador sa homicide section sa Cebu City Police Office, nga dihang may nanaug nga pasahero, kalit lang niduol ang suspek ug nidunggab sa biktima gamit ang gunting.
Dali nga nakalikay ug nakaambak ang biktima, gipatiran ang suspek ug nahitabo ang sinukmagay.
Ang drayber sa PUJ nga si Apolinar Talipot ang dali nga mitabang sa iyang kauban nga si Alajid ug gisumbag ang suspek ug gibunalan sa tire wrench sa ulo si Lindangan. Dali nga gidala sa Cebu City Medical Center si Alajid samtang dali usab nga gisikop sa mga barangay tanod si Lindangan ug gidala sa parehong tambalanan gumikan sa naangkon nga bun-og sa ulo. (Jojo C. Ugdol/GMR)
Hapon naghikog patay
Patay na nga nakit-an sa bayaw ang ilang umagad nga Hapon human giingong naghikog gamit ang pisi niadtong Lunes sa gabii sa sitio Upper Guiwanon, Poblacion, lungsod sa Compostela.
Ang nagpakamatay naila nga si Yoshio Suzuki Usui, 67-anyos kinsa nadiskobrehan ni David Guilipa nga nagbitay na sulod sa ilang balay.
Pisi ang gigamit sa paghigot sa iyang liog ug gibaat sa railings sa ilang hagdanan. Dali pa unta nga gidala sa Danao District Hospital ang langyaw apan nakabsan gyud sa kinabuhi.
Sa imbestigasyon sa kapolisan nasayran human nagkalalis ang Hapon ug asawa nga si Lalaine, nibiya ang Hapon sa ilang balay ug mipuyo sa pikas nga balay hangtud nasayran nga naghikog. -/GMR) (BANAT NEWS)