CEBU, Philippines – Medico legal sa Philippine National Police Crime Laboratory -7 nga si Dr. Benjamin Lara miingon nga patay nang daan ang masuso nga gianak sa usa ka Antoniette Torreon diha sa Vicente Sotto Memorial Medical Center.
Kini base sa iyang nakita sa gihimong autopsy usa ka adlaw human nga nagpatabang ang mga ginikanan. Ang masuso gipanganak nga patay na niadtong Domingo ug hapon na nahibaw-an sa amahan nga si Renjie Torreon.
Sumala pa ni Lara, natural sa unod sa tawo nga mo-react sa formaldehyde (formalin) kun mahumod niini, mao nga di na niya makita kun unsay hinungdan sa pagkamatay sa masuso, apan base sa iyang pagsusi, patay na gyud kini daan sa sud pa lang sa tagoangkan sa inahan.
Gitug-an sa Commission on Human Rights (CHR) 7 nga mohimo sila og imbestigasyon kalabot sa pagkamatay sa masuso kun moduol kanila ang kabanay sa masuso.
Sigon pa ni Atty. Dante Jagman sa CHR-7 sa interview sa dyAB kagahapon, gitahasan ang Investigation Division pinangulohan ni Primo Cadampog sa paghimo og imbestigasyon.
Kini ilabina nga ang ginikanan sa batang namatay nga sila si Renjie ug Antoniette Torreon nga taga Sitio Upper Sampaguita sa Barangay Banilad dakbayan sa Mandaue niduol na sa Department of Health (DOH) 7.
Apan ang nagdumala sa VSMMC kusganong nihimakak sa maong taho pinaagi sa pagtumbok nga pre-mature ug patay nang daan ang bata sa wala pa kini gihimugso sa maong tambalanan.
Si Mayor Michael Rama sa dakbayan sa Sugbo mimando kagahapon sa buntag ni Konsehal Gerardo Carillo, chairman sa committee on social services ug sa City Social Welfare and Development (CSWD) sa pagsuta bahin sa nahitabo sa VSMMC.
Gawas kang Carillo ug sa CSWD ang city legal office gimandoan usab sa mayor sa pagsusi sa insidente sa tuyo nga matabangan ang pamilya sa masuso. -/EIM) (BANAT NEWS)