CEBU, Philippines - Gipahibawo sa kadagkoan sa Department of Environment and Natural Resources (DENR) 7 nga gipakunhoran ang gahin sa ilang ahensya alang sa disaster risks reduction programs sa Central Visayas sa sunod tuig. Tungod niini, gipaabot nga mominos ang mga proyekto sa DENR nga mapatuman aron kapugngan ang posible nga pag-igo sa katalagman.
Matud ni DENR-7 Regional Executive Director Isabelo Montejo nga P663.4 milyones ang gahin sa ilang ahensiya sa sunod tuig alang sa disaster risk programs.
Kini sama sa pagpugong nga may makalas nga kinabuhi ug pagkadaot sa kabtangan ug ingon man paghatag unta og panginabuhian sa mga biktima sa kalamidad. Si Montejo niingon nga ang ilang budget sunod tuig mas ubos kini og nuybe porsiyento sa gahin nila karong tuiga nga miabot og P732 milyones.
Ang labaw’ng opisyal sa DENR nagkanayon nga ipadayon sa DENR-7 ang gikinahanglan nga programa aron makatabang sa paglambo sa katawhan sa Central Visayas.
Ang kalihukan gitambungan sa 60 ka opisyal sa DENR 7, Mines and Geosciences Bureau (MGB)-7 ug Environmental Management Bureau (EMB) apil na ang mga provincial and community environment and natural resources officers (P/CENROs). (BANAT NEWS)