CEBU, Philippines - Usa ka gipasanginlang level 2 drug pusher sa Sitio Humay-Humay sa Barangay Pajo sa dakbayan sa Lapu-Lapu ang naaresto sa Cebu Anti-Illegal Drug Special Operations Task Group atol sa buy-bust operation sa Barangay Poblacion sa dakbayan sa Lapu-Lapu sa miaging Huwebes sa buntag.
Matud ni Police Inspector Judith Besas sa Lapu-Lapu City Police Office-CAIDSOTG ang nasikop mao si Ronie "Ding" Sagarino, 50, kinsa nadakpan na kaniadto apan nakapiyansa.
Si Sagarino naposasan dihang nitunol og usa ka gamay’ng pakete sa drugas didto sa merkado. Dugang upat ka mga medium sized nga paketeng shabu ang nakuha kaniya nga gibanabana nga moabot og P247, 800 ang street value.
Nakuhaan usab siya og drug paraphernalia ug ang P500 nga marked money. Usa ka semanang gipanid-an ang suspetsado. Kasong paglapas sa Republic Act 9165 kon Dangerous Drug Act of 2002 ang ipasaka kaniya. (Christell Fatima Tudtud/EIM)(BANAT NEWS)