CEBU, Philippines - Gumikan sa isyu sa imoralidad, buot paluwaton ni Gob. Hilario Davide III sa katungdnan ang chief security officer sa Kapitolyo nga si Anthony Loy Madrigal.
Kini human mikatap sa social networking site nga Facebook ang hulagway ni Madrigal kauban sa iyang sekretarya kinsa nagpa-uraray sa abaga samtang nanglingkod sa airport terminal.
Nasayran nga niadtong Martes gi-upload ni Medellin Mayor Ricky Ramirez sa iyang Facebook account ang duha ka hulagway ni Madrigal ug sa maong babaye.
Hinuon, wala gi-detalye kung kanus-a nakuha ang maong hulagway.
Si Davide nakakita na sa maong hulagway kagahapon ug gimanduan niya si Provincial Administrator Mark Tolentino pagpahigayon og imbestigasyon.
Apan matud sa gobernador nga bisan sa ilang paghatag og due process pinaagi sa imbestigasyon sa Committee on Discipline and Investigation, gusto niyang mo-resign na lang sa katungdanan si Madrigal ug ang iyang sekretarya tungod sa nabisto nila nga relasyon.
Nasuta nga dugay ra nga nakadungog sa maong estorya si Davide nga dunay relasyon si Madrigal ug ang sekretarya niini apan wala siya manumbaling tungod sa pagtuo nga dili kini tinuod.
Gipadayag ni Davide nga dili maayo alang sa duha ka trabahante sa gobiyerno nga dunay tinago-tago nga relasyon ilabi na kay matud niya pulos minyo si Madrigal ug ang iyang sekretarya.
Gawas pa, anaa usab sa lagda sa Civil Service nga dili makigrelasyon ang usa ka superior official ngadto sa iyang subordinate o sakop.
Gisuway og kuha ang habig ni Madrigal labot sa maong issue apan dili makontak ang iyang cellphone ug wala usab kini mopakita sa Kapitolyo lakip na ang iyang sekretarya.
Hinuon, si Davide miklaro nga girespeto niya ang relasyon sa duha apan dili siya gusto nga magpabilin sila sa Kapitolyo.
Ang gobernador wala’y ikasulti nga bati ngadto kang Madrigal ilabi na sa iyang performance tungod kay subsob man ang gihimo niining operasyon labot sa ilegal nga pagpangisda ug uban pa. (BANAT NEWS)